Kooperatiba ng Batangas Binigyang-pugay

Batangas City--Kasabay ng pagdiriwang ng Coop Month ay binigyang pagkilala ng administrasyon ni Governor Vilma Santos Recto ang ilang mga ahensya sa Batangas para sa malaking kontribusyon sa pagpapaunlad ng kooperatiba sa buong lalawigan.

   At sa pangunguna ni Gng. Celia Atienza at ng mga bumubuo sa ProvincialCooperative Development Office, ginanap noong ika-20 ng Nobyembre ang Cooperative Assembly and Forum sa Provincial Auditorium kung saan nagtipon-tipon ang libo-libong miyembro ng iba’t ibang kooperatiba sa Batangas para sa isang araw ng pagbibigay pugay sa kanilang tulong na naiambag sa probinsya.

   

   Sa tatlong daang kooperatiba ay natatanging pinapurihan ang Multi-Purpose Cooperative ng Tuy na tumanggap ng parangal na pinakaaktibong kooperatiba sa pabahay mula sa National Housing Authority at maging ang Honeybee Products Multi-Purpose Cooperative na kinilala ng Department of Labor and Employment bilang National Winner sa Productivity Olympics sa larangan ng Agri-Business Sector Micro Enterprise.

   Kabilang din sa mga nabigyan ng Gawad Pitak Regional Awards mula sa Land Bank of the Philippines ang Ibaan Market Vendors Multi-Purpose Cooperative na nanguna sa non-agricultural category samantalang  ang Buklod Unlad Multi-Purpose Cooperative ng Taysan ang nanguna sa agricultural category. At bilang Platinum Awardee, tinanggap ng Soro-soro Ibaba Development Cooperative ang parangal mula sa LBP.

    Lubos naman ang pagpapasalamat ni Governor Vilma para sa patuloy na pag-asenso ng mga kooperatiba na tinagurian niyang tunay na kabalikat ng pamahalaan para sa pagsulong ng Lalawigan ng Batangas. Kristina Marie Joy B. Andal – Batangas PIO Capitol