Edukasyon: Mahalagang Kayamanan

   Ang araw ng pagtanggap ng mahalagang katunayan (DIPLOMA) ng pagtatapos sa pag-aaral ay isa sa pinakamahalagang bahagi sa kasaysayan ng buhay ng isang tao.

   Ang paglilinang at pagtatanim ng karunungan sa ating isip ng dahilan ng ating pagkakalalang at kasaysayan ng daigdig buhat ng likhain si Adan at Eba ay siyang nagbibigay sa atin ng gabay upang tayo ay magsikap mabuhay ayon sa kalooban ng Dakilang Manlilikha.

   Ang mga karunungang napasulat sa mga aklat ang nagbibigay sa atin ng kaalaman na ang tao lamang ang nilikha na biniyayaan ng Dakilang Manlilikha ng karunungan. Ang karunungan ginamit niya sa paglikha ng lahat ng bagay. Ang tao lamang, ang may kakayahan na pag-aralan at malaman ang dahilan at layunin ng Dakilang Manlilikha sa pagkakalalang sa kanya.

    Ang mga hayop, isda at halaman ay nilikha ring may buhay subalit hindi sila biniyayaan ng karunungan. Hindi nila alam na ang araw ay sumisikat sa Silangan at lumulubog sa kanluran. Hindi nila alam kung ano ang kahulugan ng buhay.

   Ang katotohanang ito ang dahilan kung bakit may nakikita lagi tayong magandang hamon ang buhay.

   Ang karunungang ito, ang nagbibigay sa atin ng kaalaman ng kahulugan ng buhay at ng kahalagahan na ang bawat yugto buhat sa ating pagsilang hanggang sa katapusang hibla ng ating hininga ay may mga gawain dapat nating isagawa at pananagutang dapat balikatin.

   Ang sabi ng isang marunong: “Ang buhay ay hindi isang patunguhan, ito ay isang paglalakbay. Lahat tayo ay nakakaranas na tumahak sa mga tuwid na lansangan at dumadaan sa bako-bakong mga landasin, uma-ahon sa mga kabundukan at lumulusong sa maaliwalas na kapatagan. Ang lahat ng nangyayari sa atin, ang siyang naglilok ng ating katauhan. At sa ating pang-araw-araw na pakikipagsapalaran sa buhay ay natutuklasan natin, ang pinakamabubuti nating katangian.”

   Ang pinag-aralan ang nagbibigay sa atin ng tamang mga daan dapat nating tahakin upang marating natin ng mapayapa, maligaya at matagumpay ang hangganang pinangarap nating lakbayin.

   Ang pinag-aralan, ang nagpapaunlad ng lahat ng mabubuting mga katangiang ipinagkaloob sa atin ng Dakilang Maykapal. Ang mabubuting katangian nagpapaunlad sa ating katauhang siyang sandigan ng pagtatayo at pagpapatibay ng isang maligayang tahanang nag-aambag ng pagsulong ng KATARUNGAN na sandigan ng KAPAYAPAAN, na sandigan ng KAUNLARAN sa pamayanan.

   Mabuhay at maligayang bati sa lahat ng nagsipagtapos ng kanilang pinag-aralan sa lahat ng antas at baytang ng karunungan.